Friday, August 11, 2017

එකම හිත මම හොයන











සිඳ දමා තටු යුවල
නිල් අහසෙ තතු කියන
උගුල්ලා නෙතු සඟල
පුන් සඳේ රුව ගයන
බැඳ දමා තොල් යුගල
ගයන්නට තනු වයන
නුඹ තමා,අරුමයකි
එකම හිත මම හොයන,,,

අඩන්නට කඳුළු දී
සිනාසෙන්නට කියන
තැවෙන්නට හේතු දී
සැනසෙන්න මග කියන
දැවෙන්නට ඉඩ දිදී
නිවෙන්නට මට කියන
නුඹ තමා,අරුමයකි
එකම හිත මම හොයන,,,

සිතන්නට නොදී මට
සිතෙන්නට ඉඩ හරින
රැදෙන්නට නැතත් මට
මිදෙන්නටවත් නොදෙන
බිඳින්නට බලාගෙන හීන
පැතුමන් ගෙනෙන
නුඹ තමා,අරුමයකි
එකම හිත මම හොයන
,,,,,,,,,






Thursday, May 18, 2017

දේශයේ මුර දේවතාවො














හිතට හයියක් රැගෙන එදවස
හිසට බර වැඩි කරන් එදවස
ගතට හරි වෙහෙසක්ද එදවස
නුඹ රැක්කෙ ලක් මෑණි එදවස

දෙමාපිය සිය සොයුරු නෑ සැම
සිය බිරිද දරු පැටව් ටික සැම
පෙම්වතිය යහළුවන් නැති කොට
හිතට තනියක් දැනුනෙ සැම විට


රැක්ක කොට නුඹ දුරක සිට අප
ලෙන්ගතුයි සිත සොයුරු නුඹ හට
තුණුරුවන්ගේ පිහිට හැම හට
පතන්නේ හද බැති සිතින් අප හැම

තිස් වසක් ගත වුනා යුද්ධය
නුඹ දිරිය ගෙන රැක්ක මවු බිම
සැමට සාමය අරන් දුන ඔබ
විරුවො වේවා සදා සමරණ


Wednesday, May 10, 2017

ලොව උතුම්ම වෙසක් දිනය














සල් උයනෙහි ලුම්බිණී
සිදුහත් පුතු ඉපදුනී
ලොව සනසන වෙසක් මගුල
ඒ අසිරිය වෙනුවෙනී

හිමි සිරි පද පුඅදනට
මල් පිබිදෙයි තරගෙට
බිගු තුරුගොස පැතිරී යයි
වෙසගෙහි මහ මගුලට

බිම්බා සහ රහල් පුතා
අටහහැරි මොක් සුවය පතා
සක්විය සැප පිළිකෙම් කල
අපේ සිදුහත් බෝදි සතා

හිමිගේ මහ ගුණ හමුවේ
වසවත් පැරදී දිව්වේ
ඒ බව කියමින් තවමත්
සිරිමහ බෝපත් සෙලවේ

ගසක් යටම ඉපදුනී
ගසක් යටම බුදු වුනී
පිරිනිවුවදබුදු සමිදානෝ
ගසක් යටම සිදු වුනී

මලපුතු කරපින්නාගෙන
බෙහෙතක් සෙව් පනගන්නා
සෑසී පිලිසරන ලබා
කිසා නිවන් මග උන්නා

සුනීත සෝපාක වැනී
අම්බපාලි කතුන් වැනී
අසරණ අය සුවපත් කර
අපෙ බුදු ජීවකයානෙනි

බුදු ගුණ නව අරහාදී 
සීපත් කොට සිත පැදී
සම්බුදු සරනින් සැමහට
වේවා සුබ සෙත සැදී




Wednesday, April 19, 2017

සමුගත් අවුරුදු උළෙල









දැන්වත් ඉතිං කොවුලෝ
නවතන්න ඔය සවුද
සොයා ගන්නට කාළයයි
කුළියට කාක කැදැල්ලක්
පුපුරයි අසනි නුබ ගැබ
හෙලන්නට මොර ගෙඩි වැසි
සේදිය යුතුය මේ බිම
කූට වෙළදුන්ගේ දූලි කුණු
බහලනු සොදා රබාන
කෝදුරුවන් පිරුනු අටු මත
ගයලා සුරල් නව පද
FM කොමලියන්ගේ සුකුමොළ
රත් පැහැ එරබදුව විලි වැද
මියගිය බදුය කටු මත
මැයි මල් පිපේ තුරි හිස
වෙසගේ වෙලද සිරි ගෙන
කණකර දුලබ අභරණ
කරගල ගගා ක්ෂය වුන
නෙක නෙක තිළිණ වරදන
පුද දෙති බැංකු සුජනන
තුන් කුදුව නැග බස් මත
දිවයනු යෙහෙකි වැඩ බිම
දින දසුන පිරී කොටු මත
දින සති දුකින් වැලපෙන




Thursday, April 13, 2017

අවුරුදු ආවා









කොහෝ තුටින් ගීත ගයන
තුරුලිය මල් වලින් පිරෙන
නැවුම් හැගුම් දෝර ගලන
අවුරුදු ආවා

සියොතුන් රස ගීත ගයන 
ගේ දොර හැම කල එලිවෙන
නැවුම් හැගුම් දෝර ගලන 
අවුරුදුආවා

ගොයම් කපා ගෙට ගෙනෙන්න
අලුත් සහල් බත් උයන්න
ඔන්චිලි වාරම් කියන්න
අවුරුදු ආවා

අලුත් වළ0 ගෙට ගෙන්නෙන්න
අලුත් ඇදුම් හැඩ බලන්න
කැවිලි පෙවිලි රස බලන්න
අවුරුදු ආවා

රබන් සුරල් හඩ අහන්න
හෙළ කෙලි සෙල්ලම් කරන්න
හැමෝම එකමුතු කරන්න
අවුරුදු ආවා





Tuesday, April 4, 2017

අතේ දුරින් හිටි තරමට ඇඟට සනීපයි නෑයෝ










තලන්න ඇහැකිනම් කෙනෙක් තලන්න මයි බලා ඉන්නෙ
පැටව් ටිකට බණ කියනා කකුළු මවක් වගේ යන්නෙ
තමන් හරිය කියා මිසක් අන් මතයක් නෑනේ ගන්නෙ
ළිඳේ ඉන්න ගෙම්බන් නැත ලෝකය ගැන කිසිත් දන්නෙ

කසාය බිව් ගොළුවන් මෙනි හොඳ වැඩකදි නැතිය කතා
වැරැද්දකදි උඩ පැන පැන නැති වැරදිත් කියති ගොතා
ඇතිදා ඇති - නැතිදා නැති - නැදෑයින් හැමට ඇතා
කට තද කර කන දිග හැර ජීවත් විය යුතුය හිතා

හිතේ නැතත් කම්මැළිකම ගෙයකට අපලයි වේයෝ
පොතේ පතේ අගේ නොදැන විනය කටින්නේ මීයෝ
ගතේ සවිය බල ඇති නම් ළඟම රැඳේ යයි කියෝ
අතේ දුරින් හිටි තරමට ඇඟට සනීපයි නෑයෝ


Thursday, March 16, 2017

කුළ ගෙට යන නුඹ





නික්ම යන මොහොත
එළඹ ඇති
දියණියේ
ඉතින් කිසිදින
කඳුළක් නොහෙලන්න.
අප තුරුලේ
සැමදා ඔබට
ඉන්නට නොහැකිය
විසල් ලෝකය
නුඹ එනතෙක් බලා සිටී
අප වැනි ම වූ
තවත් මා පිය යුවළක්
නුඹට හිමි වනු ඇත
එහෙත්
අප දෙදෙන මෙන්
ඔවුන් නුඹට
ආදරය නොකරන්නේ යැයි
වේදනා නොනගන්න
නොතැලෙන යකඩය
කිසිදා
මුවහත් ද නොවේ
පුංචි මල් කුමරියේ
මවුපියන් වීම නම්
මෙලොව ඇති 
ලොකු ම අරුමයයි
උතුරා යන සෙනෙහස
නුඹට මිස
අන් කිසිවකුට
ඒ අයුරින් ම
දීමට
නොහැකියි.









Monday, March 13, 2017

බාලගිරි දෝශේ







මගුල් පෝරුව 
තව දුරයි
ඇය මගෙයි
මම ඇගෙයි
රන් හූය බැදි
දෑගිලි දකින්නට
අපි දකින හීන
එළිවෙනතුරා පමණයි
ඔරලෝසුවේ කටු අතරෙ
දින දසුනෙ පිටු අතරෙ
දුවයි කල් අකල් මායිම
පසු කරන් අපෙ 
කල වයස















Thursday, March 9, 2017

එකම අරමුණක්...








මා රැකියාවට ගොසින්
ආපසු එනතුරා
නුඹ බලා සිටියා එදා
නුඹෙ පුංචි සන්දියේ
මා කිසිවක් ගෙන එතැයි
අපේක්ෂාවෙන්...

එලෙසින් ම
නුඹ එනතුරා
මමද බලා සිටින්නෙමි මෙදා
මගෙ සැඳෑ දිවියේ
නුඹ සුවෙන් එතැයි යන
එක ම එක අපේක්ෂාවෙන්





Saturday, March 4, 2017

හිතාපන් හෙටක් යෙහෙලියේ







කඳුළු ගීතයකට
තනුවක් නොවී නුඹ
සෙනෙහෙබර කවි පෙළක
පදවැලක් වුව මැනව
කළුවර වූ විජිතයක
අමාවක නොවී නුඹ
සොඳුරු මඟ දිදුලවන
සරා සඳ වුව මැනව
සුවිසල් මන්දිරයක
සෙව්වන්දියක නොවී නුඹ
පුංචි නිවහනකට
සිතුමිණි පහනක් වුව මැනව
මිරිඟුවට ලුහුබඳින
මුවැත්තියක නොවී නුඹ
ගුණ නුවණ දියුණු කළ
නැණ පහන වුව මැනව....




Friday, March 3, 2017

මධුවිත









හිතන්නට
ගයන්නට
වයන්නට
නටන්නට
දොඩන්නට
මියෙන්නට

Tuesday, February 28, 2017

හැම රාත්‍රියක කවියක් වී, දුක කියනා හිතේ...







හැම රාත්‍රියක කවියක් වී,
දුක කියනා හිතේ...
හැම ආත්මයක පැතුමක් වී 
නුඹ උන්නා වගේ... 
හිත පුරාවටම අවතැනවී
හඩන හැඩුම මගේ... 
ලය පුරා දුවන හුස්මක්වී 
හිත නවතිනු දැනේ... 
එක ආත්මයක පතාන ආ 
දුක් සංකා අපේ....
හිත හැදු තරම් ලගම ඉදන්,
ආදරයෙන් මගේ ....
නිසොල්මනේ මා ගොතනා, 
කවක් වෙලා රැයේ .... 
හීන හතක් මැද හැමදා 
නුඹ උන්නා මගේ.... 
සංසාරේ පතාන ආ 
මේ ආදරේ හිතේ.... 
නිම්මා නැති ආල කතා 
කොදුරන මැදියමේ.... 
අමාවකේ තරු අහසට,
ශාප නොකර අනේ.... 
පායාපන් මගේ සදයි, 
නුඹ තරු මැද රැයේ.... 
හීන තියා හිත දොරකඩ, 
මං ඉන්නවා වගේ.... 
නුඹ නේනා හැම හීනෙක , 
තනිවෙනු බැහැ අනේ....
හිත අස්සේ අහුමුලුවල 
පෙම හංගා තියේ....
යලි නාවත් එ් හැම තැන , 
නුඹේ සුවද දැනේ.....





Wednesday, February 22, 2017

►►ස්වාමි පුරුෂයන් විකිනීමට තිබේ◄◄







නිව්යෝර්ක් නගරයේ අලුත් වර්ගයේ සාප්පුවක් විවෘත වුනා.මේ සාප්පුවෙන් කාන්තාවන්ට සැමියන් අලෙවි කල අතර කාන්තාවන්ට පැමින තමන් කැමති ආකාරයේ සැමියෙක් තෝරා මුදල් දී ඔහුව රැගෙන යාමේ හැකියාව තිබුනා.
මෙම සාප්පුවට ඇතුල් වෙන දොර ලග සාප්පුවෙන් සැමියෙකු මිලදී ගැනීමේදී අනුගමනය කල යුතු උපදෙස් අඩංගු බෝඩ් එකක් එල්ලා තිබුනු අතර එහි තිබුනේ පහත උපදෙස්,
▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀
•ඔබට මෙම සාප්පුවට ඇතුල් විය හැක්කේ එක් වරක් පමනයි.
•මෙම සාප්පුව මහල් 6කින් සමන්විත වේ.
•මහල් ඉහලට යන විට ඒ මහලේ සිටින පුරුෂයන් ගේ සුදුසු කම් ඉහල යයි.
•ඔබට එක් මහලකට ගිය විට කල හැක්කේ ඒ මහලෙන් පුරුෂයෙක් තෝරා ගැනීම හෝ ඉහල මහලට යාම පමනයි.
•ඔබට නැවතත් පහත මාලයකට යා නොහැකි අතර කල හැක්කේ සාප්පුවෙන් පිටවීම පමනයි.
▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀▀

ඉතින් ඔන්න ලස්සන කාන්තාවක් දවසක් මේ සාප්පුවට ගොඩ උනා ස්වාමි පුරුෂයෙක් මිලදී ගන්න.
පලමු මහලට ඇතුල් වෙන තැන දොරේ මෙහෙම බෝඩ් එකක් ගහල තිබුනා.
►පලමු මහල:මෙහි සිටින පුරුෂයන්ට රැකියා ඇති අතර ඔවුන් ආගම දහමට ලැදිය.

පලමු මහලේ වටයක් ගියපු කාන්තාව දෙවෙනි මහලට ගියා,දෙවෙනි මහලට ඇතුල් වෙන තැන දොරේත් බෝඩ් එකක් ගහලා තිබුනා.
►දෙවෙනි මහල:මෙහි සිටින පුරුෂයන්ට රැකියා ඇති අතර ඔවුන් ආගම දහමට ලැදිය,කුඩා දරුවන්ට බෙහෙවින් ආදරේ කරයි.

දෙවෙනි මහලෙත් වටයක් කැරකුනත් හිතට හරි නොගිය නිසා මෙයා තුන් වෙනි මහලටත් ගියා,තුන් වෙනි මහලට ඇතුල් වෙන දොරේ ගහල තිබුනු බෝඩ් එකේ ගහලා තිබුනේ මෙහෙම කතාවක්.
►තුන්වෙනි මහල :මෙහි සිටින පුරුෂයන්ට රැකියා ඇති අතර ඔවුන් ආගම දහමට ලැදිය,කුඩා දරුවන්ට බෙහෙවින් ආදරේ කරයි,බෙහෙවින් කඩවසම්ය.
තුන් වෙනි මහලේ වට 2ක 3ක් මෙයා කැරකුනා..ගොඩක් කඩවසම් පුරුෂයෝ දැකලා දෙතුන් පාරක් "ෂා..." කියලා කියවුනත් මෙයා හතර වෙනි මහලටත් යන්න තීරනය කලා.

සුපුරුදු පරිදි හතර වෙනි මහලට ඇතුල් වෙන දොරෙත් බෝඩ් එකක් තිබුනා.
►හතරවෙනි මහල:මෙහි සිටින පුරුෂයන්ට රැකියා ඇති අතර ඔවුන් ආගම දහමට ලැදිය,කුඩා දරුවන්ට බෙහෙවින් ආදරේ කරයි,බෙහෙවින් කඩවසම්ය,ගෙදරදොරේ වැඩ කටයුතු වලට උදව් කරයි.
"අනේ දෙවියනේ මේ ලෝකේ මෙහෙම පිරිමිත් ඉන්නවාද..." කියලා හිත හිතා හතර වෙනි මහලෙත් වට 3-4ක් කැරකුනා.අන්තිමේදි මෙයා පස්වෙනි මහලටත් යන්න පිටත් උනා.

පස් වෙනි මහලට ඇතුල් වෙන දොරේ ගහලා තිබුනේ මෙහෙම බෝඩ් එකක්.
►පස්වෙනි මහල:මෙහි සිටින පුරුෂයන්ට රැකියා ඇති අතර ඔවුන් ආගම දහමට ලැදිය,කුඩා දරුවන්ට බෙහෙවින් ආදරේ කරයි,බෙහෙවින් කඩවසම්ය,ගෙදර දොරේ වැඩ කටයුතු වලට උදව් කරයි,සෑම දිනකම භාර්යාවට තෑගිබෝග ලබා දෙනු ඇත.

පස්වෙනි මහලේ නම් මෙයා වට 10ක් 12ක් කැරකුනා..සමහර වෙලාවට ඇස් දෙක ලොකු කරන් බලන් හිටියා...අනාගත සැමියා ගැන සිහින මැව්වා.
ඒත් මෙයාට හිතුනා අන්තිම මහලටත් ගිහින් බලන්න ඕනි කියලා.
අන්තිම මහලට ඒ කියන්නේ හයවෙනි මහලට ඇතුල් වෙන තැන දොරේ ගහලා තිබුනේ අමුතුම විදියේ බෝඩ් එකක්,ඒකෙ මෙහෙමයි තිබුනේ.

►හය වෙනි මහල:ඔබ මෙම මහලට ඇතුල් වන 4758943 වන කාන්තාව වන අතර මෙම මහලේ කිසිම පුරුෂයෙක් නොමැත.
මෙම හයවෙනි මහල පිහිටවීමේ එකම අරමුණ නම් කාන්තාවන් සෑහීමකට පත් කල නොහැකි බව ඔප්පු කිරීමයි.
ස්වාමිපුරුෂයෙක් මිලදී ගැනීමට අප සාප්පුවට පැමිනි ඔබට ස්තූතියි!!!

උපුටා ගැනීමකි

Thursday, February 9, 2017

සිනාසී දිවි ගෙවමි





මේ සුසුම බර වැඩියි
නොහෙලාම සිනාසෙමි
මේ කඳුළු නෙත දවයි
බොඳ නෙතින් බලා ඉමි


සිතන්නට වරම් නැති
සිතුවිල්ල අතරමැද
කිසිත් නොවූ විරූ
සිනාසී දිවි ගෙවමි

Thursday, February 2, 2017

වසන්තය එන තුරා








වසත් කල මල් කැකුළු
පුබුදිනා බව කියති
තුරු වදුලු මල් උයන්
හිනැහෙනා බව කියති

විහග කැළ පෙම් ගීත
මුමුණනා බව කියති
කදුළු වියැකිලා ගොස්
සතුට එන බව කියති

හිරු සදුද තාරකා
හිනැහෙනා බව කියති
මිනිස් සිත මනු දමින්
පිරෙන කාලය කියති

සදා කල් මග බලන්නැයි
මගේ සිත කියති
සොදුරු වූ වසත් කල
එනතුරා මග බලමි



Wednesday, February 1, 2017

ආදරය




අරලියා මල් මතට
සද ඇබිත්දක් වැටෙනකොට
කිතිකැවෙනවා වගේමයි
නුඹ කියා දුන් ආදරය

ගංදෑල ඉවුර ලග
ගල්තලාවේ ඉදන්
නුඹේ සිනිදු අතැගිලි පොඩි
අල්ලන්න හිත කියයි

මලක මෙලෙකකට වැඩිය
නුඹේ සිනිදු කම්මුලට
හාදුවක් දෙන්න
හිත කියයි

රෝස මලකට වැඩිය
නුඹෙ සිනිදු කම්මුලට
මගෙ දෙතොල් රළු වැඩිද
මට සැකයි


Monday, January 30, 2017

තනිකඩයාගේ කවිය




කුල මල මිළ මුදල් දේපල  ජාති බේද අතරේ තනිවන යව්වනය




නොනිදි රැය දිගු වුවත් 
සඳ එළිය හරි කළුවරයි
අමාවක අත වනයි 

පෝය නික්මෙන හැඩයි

 දුරුත්තේමල් සුවඳ

 මගෙ පැලට අකැපමයි
ප්‍රේමයේ හව්හරණ 
කාසි ළඟ රැකවලයි

කල්පයක් වූ හීන 
හීනයට ඉඟිමරයි
නියංසායට දැවුණු 

ඉපල් මදහස පුරයි

එකම පරපුරක උරුම 

මේ කඳුළු උණුහුමයි
දුරුතු මහ හීතලයි 

තනිකමට සරදමයි

තරු එළිය මඟ නොකී 
යෞවනය තනිකඩයි
ගුරුපාට අතීතය 

මදහසට විරසකයි

පුර හඳට පෙම් පිරුව 

හදවතට දුක බරයි
කවි හිතම ගැබ්බරයි 

පත් ඉරුව තනිකඩයි




















Friday, January 20, 2017

සොයයි නුඹ ( ඉකිගසන තාරුණ්‍ය)





දෙතොල හරහා
ඇඟිලි තුඩගින්
අඳිමි මතකෙන් 
සිනහ සලකුණු

දෙනෙත ගැඹරෙහි
කිමිද මොහොතක්
සොයා යන්නෙමි
මතක විසිතුරු

අවුල් කෙහෙරැළි
අතර පැටලී
සුළං රැළි වෙමි 
සිඹින නිරතුරු

රුවක නතරව
අතරමං වෙමි
සිහිනයක් වී 
හෙටත් එනතුරු

බිඳෙන් බිඳ නුඹ ගෙනත්
මගේ හිතට ගොඩගහන
මේ සිනා ළවැලි ගෙන 
මාළිගා තනමි මම 

සයුරු තෙර කළඹමින්
රුදුරු රළ නැඟෙන ඉම
නොතනන්න මාළිගා
උගෙනගමි ඉතින් මම





Tuesday, January 17, 2017

වියපත් සිතුවිලි වියපත් බිරියකගෙන්












අපට වැඩියෙන් සීරුවට ගොම්මනේ අඳුර
වෙළාගෙන අප දෑත නිසොල්මන් අවරට ම
සනහමින් සියොළඟම පුරුදු පිල්කඩ හිඳින
හැරමිටිය දන්නවයැ අප දුටුව පෙම් හීන

ඉරිතැලුණු දිවි ගඟේ පතුල හොරැහින් බලා
නොදරු දරු අප තුරුණු වෙස් රැගෙන ඉගිලුණා
මඳින් මඳ නිවෙන තරු අඩ එළිය ඇතිරෙනා
ගිලී ගිය ඇස්වලින් පෙනේ ඉස්සර දසුන්

තුඩලමින් පෙම් අමා පැන් පොදක් මඳහසින
අදර වියමන් බඳින විහඟ නෙත් නිදිබරය
මස් වැදලි එකිනෙකට ඇලුණු නුඹෙ පුළුලුරේ
තබන්නද හිමි සඳුනි, ම හිස සෙනෙහෙන් බරවු



Wednesday, January 11, 2017

නෙතු කදුළැලි නුඹට කී කවි





සිරි සිරි නදින් සීතල පිනි වැගිරෙනවා
මල් මී පිරීලා බමරුන් කැඳවනවා
මුදු මඳ පවන් වැද හිරිගඩු නැංවෙනවා
“නුඹ නැති දුකට නෙත කඳුලැලි වැගිරෙනවා”


මීමැසි රංචු ඇයි මල් වෙත ඉගිලෙන්නේ
ගංගා ගලා කිම සමුදුරටම යන්නේ
විහඟුන් මොට ද? රස ගීවැල් මුමුනන්නේ
“මගෙ සිත කුමට නුඹ සොයමින් ළතවන්නේ”


හතිලන සිතට ඉකිලන සුසුමක් ඇතිව
දසඅත ඉගිල්ලෙන සිතුවිල්ලට නතුව
“කොඳුරන අතීතය සිහිකර රස මුසුව
වැලපෙමි කඳුළු නොහෙලා මා අන් සතුව