මගෙ හිතට බරක් නැත

අද උඹට මහන්සිද

වතුර පොදකුත් දේද

හිතේ බර මට දියන්

ආදරෙන් කියනවද

කොහේවත් නුඹ නොයන්

මගෙ හිතට බරක් නැත

හැම ආත්මෙ ම ඉමුද

මේ ටිකත් දුර වැඩිද

මමයි නුඹ – නුඹයි මම

වෙන දිනය ළඟක නම්

මගේ ළඟ නුඹ හිඳින්

මගෙ හිතට බරක් නැත

අහස වැටුණා වගේ

මහ බරක් මගේ හිසට

කණට ගැහුවා වගේ

නුඹේ වදන් අතුල් සැර

නුඹ කොහේ ගියත්

මගෙ හිතට බරක් නැත

නික්ම යාම

නික්ම යන මොහොත
එළඹ ඇති
දියණියේ
ඉතින් කිසිදින
කඳුළක් නොහෙලන්න.
අප තුරුලේ
සැමදා ඔබට
ඉන්නට නොහැකිය.
විසල් ලෝකය
නුඹ එනතෙක් බලා සිටී.
අප වැනි ම වූ
තවත් මා පිය යුවළක්
නුඹට හිමි වනු ඇත.
එහෙත්
අප දෙදෙන මෙන්
ඔවුන් නුඹට
ආදරය නොකරන්නේ යැයි
වේදනා නොනගන්න.
නොතැලෙන යකඩය
කිසිදා
මුවහත් ද නොවේ.
පුංචි මල් කුමරියේ
මවුපියන් වීම නම්
මෙලොව ඇති 
ලොකු ම අරුමයයි.
උතුරා යන සෙනෙහස
නුඹට මිස
අන් කිසිවකුට
ඒ අයුරින් ම
දීමට
නොහැකියි.